Hugleiðingar um alls kyns matar- og víntengd efni.
Lesendum gefst kostur á að segja skoðun sína við hverja færslu.
Heimsmeistaramótið í grautargerð
Ekki veit ég hvort þið kannist við verkfæri sem á ensku kallast spurtle en mætti kannski kalla grautartein eða eitthvað slíkt á íslensku. Þetta er tréteinn sem notaður er í Skotlandi til að hræra í hafragraut. Ég á náttúrlega svona tæki og nota það auðvitað eingöngu til að hræra í hafragraut (þegar ég man eftir því - oftast gríp ég nú bara næstu sleif).
Heimsmeistaramótið í hafragrautargerð heitir einmitt The Golden Spurtle Championships og fór nýlega fram í 12. sinn í Skotlandi. Á heimasíðu keppninnar má finna heilmikinn fróðleik um grautargerð og fjölda uppskrifta.
Nanna
Samlokudagurinn
Það er samlokudagurinn í dag. Afmælisdagur Johns Montague, fjórða jarlsins af Sandwich. Sagt er að samlokan (sandwich) sé kennd við hann á ensku. Hann var mjög ákafur fjárhættuspilari og til að þurfa ekki að standa upp frá spilaborðinu þegar hann var svangur lét hann færa sér kjötsneið á milli tveggja brauðsneiða.
Reyndar finnst mér frekar ólíklegt að engum hafi hugkvæmst þetta fyrr en svona er nú sagan og af einhverri ástæðu heita samlokur sandwiches á ensku. Kannski væri tilvalið að hafa grillaðar ostasamlokur í kvöldmatinn? Úr focaccia-brauði, kjallarabollum eða öðru slíku, ekki brauðsneiðum; smyrja þær með smjöri og kannski örlitlu sinnepi, leggja 2-3 skinkusneiðar og kannski svolítið af stökksteiktu beikoni á hverja, þykka ostsneið ofan á, pressa saman og grilla í samloku- eða mínútugrilli (eða á grillpönnu og hafa farg ofan á).
Svona til heiðurs jarlinum af Sandwich, hvort sem hann á það skilið eða ekki. Það eru 313 ár frá fæðingu hans í dag.
Nanna
