Hugleiðingar um alls kyns matar- og víntengd efni.
Lesendum gefst kostur á að segja skoðun sína við hverja færslu.
Súkkulaðistyrkur
Það eru til ýmsir mælikvarðar á styrkleika. Eða eins og einhvern tíma var sagt:
„Styrkur felst í því að geta brotið súkkulaðistykki í fjóra parta með berum höndunum - og láta svo nægja að borða bara einn þeirra.“
Ég er alls ekki viss um að ég mundi skora hátt á slíku styrkleikaprófi.
En nú man ég að ég á súkkulaðistykki frammi í eldhúsi. Kannski ég ætti að fara og prófa styrk minn.
Hægfara og hraðfara matarblöð
Það er dálítið sérkennilegt að það virðist vera vonlaust fyrir áskrifendur að bresku matreiðslublöðunum að fá þau fyrr en fjórum til sex vikum eftir að þau koma út. Ég var t.d. áðan að fá inn úr dyrunum októberblöðin af BBC Good Food og Olive - hljómar kannski ekki svo illa en það vill svo til að októberblöðin koma ekki út í október, heldur í fyrstu viku september. Nóvemberblöð beggja tímaritanna komu svo út 5. október. Þriðja tímaritið kom líka í póstinum í dag. Það var nýsjálenska matreiðslublaðið Cuisine og maður gæti ætlað, miðað við sendingarhraðann á bresku blöðunum, að það hefði komið út um páskana. Ónei, þetta er nóvemberblaðið, kom úr prentsmiðjunni fyrir innan við tíu dögum og er þegar komið hinum megin á hnöttinn. Burðargjaldið sem ég borga fyrir þetta er litlu hærra en fyrir hægfarapóstinn frá Bretlandi.
