Hugleiðingar um alls kyns matar- og víntengd efni.
Lesendum gefst kostur á að segja skoðun sína við hverja færslu.
Kvöldverður á Bakkanum
Ég borðaði kvöldmat áðan í Rauða húsinu á Eyrarbakka, sem er reyndar ekki verulega rautt þessa stundina þótt það standi til bóta. Ljómandi góður fiskur; þorskur, lúða og skötuselur. Verulega notalegt umhverfi og góð tilfinning.
Stundum finnst mér það helsti ókostur bílleysisins að geta ekki skroppið oftar út á land að borða kvöldmatinn.
Nanna
Súkkulaðiflóðið
Við hér á Gestgjafanum erum í miklu bökunarstuði þessa dagana, þar sem við erum að ganga frá okkar árlega kökublaði. Þar verður margt girnilegt að vanda. Ég kom inn á skrifstofu hjá tveimur samstarfskonum mínum áðan og sá þvílíkar súkkulaðibirgðir þar í kössum og á borðum að það mátti heita að þær syntu í súkkulaðipolli.
Sjálf ætla ég hinsvegar að reyna að sneiða sem mest hjá súkkulaðinu þetta árið (gerði sérstakan súkkulaðiþátt fyrir blaðið í fyrra), held mig fremur við osta- og skyrkökur, smákökur og þess háttar ...
Hvern er ég annars að reyna að blekkja? Ég að sneiða hjá súkkulaði? Ætli það komi ekki einhvers staðar við sögu í því sem ég geri fyrir kökublað Gestgjafans þetta árið ...
Nanna
