Appelsínur

Sól í sinni

Ferskar og safaríkar appelsínur freista á sumrin þegar sólin skín og hitastigið fer örlítið hækkandi. Fátt er betra en nýkreistur appelsínusafi í morgunsárið en appelsínur er líka hægt að nota í hina ýmsu rétti, bæði kjöt- og fiskrétti og eftirrétti.

Sítrónukjúklingur er klassískur réttur en kjúklingurinn er ekki síðri með appelsínum og appelsínusafa; safinn gerir skinnið yndislega sætt og stökkt. Það er talið hollt að borða appelsínur með reyktum eða söltuðum mat og appelsínusalsa, sem uppskrift er að hér á eftir, er t.d. frábært með reyktum laxi eða reyktu kjöti.

Citrus sinensis
Appelsínur eru taldar upprunnar á Indlandi en nafnið þýðir upprunalega ,,epli frá Kína“.
Til eru mörg afbrigði af appelsínum. Sumar eru með steinum en aðrar eru nær steinlausar. Börkurinn er einnig misjafn, ýmist þykkur eða þunnur og ræðst það nokkuð af aðstæðum á vaxtarstað.

Algengastar eru trúlega Valencia-appelsínur sem hafa þunnan, fastan börk og naflaappelsínur sem hafa þykkan og lausan börk. Heiti eins og Sunkist er einungis vörumerki, ekki tegund og Jaffa þýðir aðeins að appelsínan hefur verið ræktuð í Ísrael.

Guðrún Hrund