Spergilblómkál

Romanescoblómkál

Spergilblómkál Spergilblómkál eða romanesco-blómkál er oft talið vera kynblendingur spergilkáls (brokkólís) og blómkáls, sem eru náskyldar tegundir, en reyndar er það blómkálsafbrigði, upprunnið í Hollandi. Kálið er reyndar mun líkara blómkáli en spergilkáli í útliti, nema hvað varðar límónugrænan litinn og nokkuð reglulega toppana sem það myndar. Bragðið er milt en minnir meira á spergilkál en blómkál. Ef spergilblómkál er látið vaxa og ná fullum þroska lýsist liturinn mjög uns kálið hefur fengið sama lit og blómkál. Hægt er að nota spergilblómkál í stað blómkáls í alls kyns rétti og raunar einnig í stað spergilkáls. Það er líka mjög gott eitt sér, e.t.v. með ídýfu. Best er að skipta því í litla kvisti og sjóða það, gufusjóða eða snöggsteikja. Það er einnig gott í súpur og sósur eða sem fylling í grænmetisbökur og fleira slíkt. Best er að velja kál sem er með þétt höfuð með jöfnum, grænum lit sem hvergi er farinn að lýsast eða verða brúnn á yfirborði. Kálið geymist í nokkra daga í poka í ísskáp. Það er vítamínauðugt og hitaeiningasnautt.