Njótum haustsins

Tólfta tölublað Gestgjafans er nú væntanlegt og það verður áfram á haustnótunum líkt og "Berjablaðið" sem nú er orðið uppselt hjá útgefanda. Við höldum upp á Ár kartöflunnar með veglegum kartöfluþætti, eldum ódýrt og athugum enn frekar hvað hægt er að gera við öll berin, og þá aðallega rifsber, sem nóg er af þetta haustið. Nú liggur fyrir okkur að útbúa frábært klúbbablað og við höfum þegar fengið að heimsækja nokkra vinahópa sem hittast reglulega og borða gómsæta rétti.

Það sem okkur er þó efst í huga á þessari stundu er sláturtíðin sem nú er að hefjast. Úlfar er að prófa nýja rétti úr lambakjöti af nýslátruðu og lætur innmatinn ekki liggja á milli hluta heldur eldar frábæra og nýstárlega rétti úr þessu bragðgóða og ódýra hráefni. Sirrý er í óðaönn að útbúa magnaðan sláturþátt þar sem gömlu handbrögðin verða m.a. sýnd en þessum klassíska þjóðarrétti okkar verður gert hátt undir höfði og kynslóðabilið brúað í sláturgerðinni. Sannarlega spennandi tímar framundan.