Grillblaðið: Á bak við tjöldin

Við á Gestgjafanum þurfum auðvitað alltaf að vinna svolítið fram í tímann og þar sem grillblaðið okkar kemur út í lok maí er ekki alltaf auðvelt að finna ósvikið grillveður, gróður í blóma og sólskin á þeim tíma sem við erum að mynda fyrir blaðið. Undanfarin ár hefur oftar en ekki snjóað þegar við ætlum að grilla en að sama skapi eru rigning og hlýindi vandamál þegar við útbúum jólablaðið. Í ár ákváðum við að tryggja okkur gegn skakkaföllum af völdum veðurs og fengum góðfúslegt leyfi til að mynda nokkra af grillþáttunum okkar í Blómavali í Skútuvogi.

Úlfar kokkur, Gerður stílisti og Kristinn ljósmyndari héldu því til í Skútuvoginum einn dag og grilluðu, stíliseruðu og mynduðu eins og þau ættu lífið að leysa. Árangurinn mun birtast í grillblaðinu sem kemur út 22. maí en blaðið inniheldur yfir 130 spennandi uppskriftir, t.d. fisk, naut, lamb, kjúkling og grís á grillið, kryddlegi, grillsósur, meðlæti, kryddsmjör, drykki og himneska eftirrétti til að toppa gómsætar grillmáltíðir.