Þráinn Freyr, Matreiðslumaður ársins 2007

Úrslitakeppnin um titilinn Matreiðslumaður ársins 2007 var haldin í Verkmenntaskólanum á Akureyri helgina 13.-14. október. Fimm keppendur börðust um titilinn; Ari Freyr Valdimarsson - Grillinu Hótel Sögu, Eyjólfur Gestur Ingólfsson - Iðusölum, Þórarinn Eggertsson - Múlakaffi, Þráinn Freyr Vigfússon - Grillinu Hótel Sögu og Ægir Friðriksson, Grillinu Hótel Sögu. Sverrir Halldórsson matreiðslumeistari og Stefán Viðarsson á Hilton Nordica sáu um dómgæslu í eldhúsi. Keppnisfyrirkomulag var svokölluð "Óræða karfan", eða "Mistery basket" á ensku, en það þýðir að keppendur fengu í hendur hráefni sem valið var fyrir þá við upphaf keppninar.

Úrslit fóru þannig að Þráinn Freyr Vigfússon, Grillinu Hótel Sögu, hlaut titilinn Matreiðslumaður ársins, í öðru sæti var Eyjólfur Gestur Ingólfsson, Iðusölum, og í því þriðja var Þórarinn Eggertsson, Múlakaffi.

Matvælasýninginn Matur-inn 2007 stóð yfir þessa sömu helgi og þar sýndu framleiðendur á Norðurlandi afurðir sínar og buðu fólki að smakka og kaupa á góðu verði.

Dómarar í keppninni voru þeir Jakob Magnússon - Horninu, Gissur Guðmundsson - Tveim Fiskum, Ragnar Ómarsson - Domo, Brynjar Eymundsson - Glitni og Kjartan Kjartansson - Hótel Loftleiðum, en þeir dæmdu í svokölluðu blindsmakki.