Tælenskar fiskibollur

Einfaldur veislumatur

Látið það ekki hræða ykkur frá uppskriftinni þó innihaldslistinn sé langur. Mest af honum er krydd og allt er sett í matvinnsluvél – 1, 2 og 3 og allt tilbúið. Þessar bollur eru mjög skemmtileg tilbreyting frá þessum gömlu góðu. Þær sóma sér einnig vel á veisluborð sem hluti af fingrafæði og þá má hafa þær litlar eða á stærð við valhnetur.

1 stilkur sítrónugras, sneiddur eða börkur af 1 límónu

4 cm bútur af engiferrót, sneiddur

2 hvítlauksgeirar

1 msk. kaffir límónulauf, fást í Asían, eða 2 lárviðarlauf

5 msk. ferskt kóríander, saxað

1 ferskt rautt chili-aldin

800 g roð- og beinlaus fiskur í stórum bitum eða fiskihakk

1 tsk. salt

80 g kókosmjöl

3-4 msk. olía

Setjið sítrónugras, engifer, hvítlauk, límónulauf, ferskt kóríander og chili í matvinnsluvél og blandið vel saman. Bætið fiski og salti út í og maukið vel saman. Bætið kókosmjöli út í og blandið vel saman, passið samt að ofhræra ekki. Formið bollur og hafið þær aðeins flatar. Steikið í heitri olíu.

Sósa:

1 msk. sesamfræ ristuð á þurri pönnu

2 msk. sesamolía

2 msk. límónusafi

2 msk. tamari-sojasósa

1 msk. hunang

½ rautt chili-aldin smátt saxað

Blandið öllu saman og berið fram með bollunum. Gott er að bera núðlur fram með.

Dominique og Eymar mæla með grüner veltliner frá Austurríki, t.d. Brundlmayer eða Lenz Moser.