Veitingar í veisluna - nokkur góð ráð

Fyrst af öllu þarf að ákveða hvort þetta á að vera matarveisla með þríréttuðum veislumat, óformlegra matarboð, smáréttahlaðborð, brauðveisla, móttaka með pinnamat eða jafnvel bara gamaldags kökuveisla. Þegar það er komið á hreint er hægt að fara að ákveða matseðilinn og hefja undirbúning.

Hafið það einfalt
Margréttaðar matarveislur þurfa ekkert að vera flóknar. Það má bjóða upp á einfaldan forrétt sem jafnvel er hægt að kaupa næstum tilbúinn, eins og graflax eða reyktan lax með tilheyrandi meðlæti, eða góða súpu með brauði. Aðalrétturinn gæti verið góð steik sem ekki krefst ýkja mikillar fyrirhafnar, t.d. lambalæri, svínasteik eða roastbeef. Og eftirrétturinn gæti verið keyptur eða heimalagaður ís, kannski með ferskum ávöxtum og góðri sósu, gott ávaxtasalat, sem hægt er að gera með nokkurra klukkutíma fyrirvara, eða kannski góð súkkulaðikaka með rjóma eða ís.

Sitt lítið af hverju
Það getur verið þægilegt að bjóða upp á smáréttahlaðborð eða pinnamat, sé þess gætt að vera ekki með of margar tegundir eða rétti sem eru mjög fyrirhafnarsamir og tímafrekir. Gott brauð með mismunandi ídýfum og sósum – pestói, hummus, bragðbættum smurosti, kryddjurtasmjöri, grilluðum tómötum og ýmsu öðru, sem jafnvel er hægt að kaupa tilbúið og gestirnir taka sér svo af sjálfir eftir smekk – verður ekki síður vinsælt en snittur sem tekur langan tíma að smyrja. Stóra skammta af heitum og köldum brauðréttum er yfirleitt tiltölulega einfalt að útbúa og svo má kaupa gott úrval af ostum og útbúa fallegan ostabakka með ostum, kexi, ávöxtum og niðurskornu grænmeti.

Hve mikið á mann?
Því fleiri sem tegundirnar eru, þeim mun meira borða gestirnir, af því að þá langar að smakka á sem flestu, og því er best að vera með fáa en góða rétti og nóg af þeim. Í kökuveislu gæti t.d. verið hæfilegt að vera með brúðkaups-, fermingar- eða aðra hátíðartertu og/eða kransaköku, tvær til þrjár aðrar tertutegundir (frekar ólíkar), og svo kannski brauðtertu og/eða einn eða tvo heita eða kalda brauðrétti. Best er að reikna með 2-3 tertusneiðum á mann (meðalstór terta er um 12 sneiðar) og vænum skammti af brauðrétti handa hverjum og einum.

Á hlaðborði, eða þegar borinn er fram pinnamatur, gæti verið hæfilegt að hafa fimm til átta mismunandi rétti, heita eða kalda. Ef um pinnamat er að ræða má reikna með að hver gestur fái sér 2-3 bita af hverri tegund. Í matarveislu ætti almennt að vera óhætt að reikna með 170-200 g af beinlausu kjöti á mann, 250-300 g ef kjötið er með beini, og um 250 g af meðlæti.

Undirbúningurinn
Sumt má búa til með löngum fyrirvara og frysta. Þetta gildir um flesta tertubotna og margar fullskreyttar tertur og kökur, svo og um t.d. litlar kjöt- og fiskbollur, vatnsdeigsbollur, ýmsa tilbúna brauðrétti og margt annað. Ýmsar sósur og ídýfur má líka frysta. Þetta gildir t.d. um ýmiss konar pinnamat og vefjur, ídýfur, bökur, brauðtertur (óskreyttar) og fleira má gera daginn áður, pakka í plast og kæla.

Ef bera á fram hrátt, niðurskorið grænmeti með ídýfu, t.d. papriku, gulrætur eða sellerí, má skera það niður að morgni veisludagsins eða jafnvel kvöldið áður og geyma í skál fylltri af köldu vatni, þannig helst það ferskt. Það sem á að vera kalt ætti að geymast í kæli eins lengi og unnt er og það sem á að vera heitt ætti ekki að fara í ofninn fyrr en svo seint að unnt sé að setja það beint á veisluborðið og bjóða gestunum að gjöra svo vel.

Nanna Rögnvaldardóttir